Revelation of John 18
Sale mananai *Babilon
1Muhin nga ningahi tel *engel liai momosulih *tone Haeu. I pate pohen ma lalape xewaian haxewa hawane tehu pon itan ie. 2I ausini eliel hawane,“Babilon tehu taon lalap i manan lialuen.
Malehe ape lialui teka seilon ti Babilon!
Tehu taon ien sohot tetesol ti kilai *spirit lialun
ma manixux tupuxa tetenen hahalin ti seilon ani ingai.
3Teka Babilon neini hakalala seilon ti xux texux texux
usiai kilai lialui woulato.
Ape laha hani hatapo tupualaha ailei saun lialun ien
nake ti xoxoi isiai pahalaha.
Teka masiwi ti xux texux texux laha akati teka Babilon
ailei lawe waliko ti Haeu watakai.
Ape teka hangainiai soxi uke hakila hawane moni
ti hamasamas ti teka Babilon.”
4Muhin nga hong tenen kinax liai luainima tone Haeu, i ukek,
“Teka seilon ti Haeu, ahuta saliliwa Babilon
lehe amuto kum tuai lato ailei saun lialun
ma amuto kum uke kawatan ti lehe Haeu axi lato.
5Ti husele lialui woulato i hamanomano loi Haeu
ape i kum paxai lioi tenen saun ti lato ien.
6Haeu, o aliake haniwa lato
masin ti lato aile haniwen teka seilon liai.
Haniwa lato kawatan uke he huohu
ti waliko lialun lato aile haniwen laha.
Haniwa lato an wakin tenen poxan
i xoini ti lato haniwen seilon liai.
7Axiwa lato moloan lalap ma aile hatahaneawa lato
lapan masin wanen ti lato sameni aliake lato
ma amumuke soliai totonalato.
Lato hanasanas ukek ka lato to masiwi
ma tatahan kum tunahi lato
hanowi teka seilon axoalaha matewen.
8Aile ape Haeu axi hulutini lato kawatan,
tenen masin matemate, tatahan ma hitolo.
Ape Babilon i lua he ah atengi tataen tuahe palong.
I sohot ukek nake Haeu tel sulualato se
Masiwi tapein.”
9“Tetesol masiwi ti pon itan ie lato tuai teka Babilon ailei saun lialun ma amumuke soliai totonalato, lato tang tahane Babilon ti lato ningahi axui ah tule ti i lulua. 10Lato tu siasia nake sale lalape moloan ti teka Babilon uke, i hamatau lato. Lato eseini ukek,
“‘Malehe ape lialui teka Babilon!
I tehu taon axan lalap
tuahe ti teik taun pate kukunun
ape lato kewen kawatan.’
11“Teka hangainiai soxi ti tesol tesol laha tang tahane nake tap ulea seilon kahuiai soxialaha. 12Tap wanen seilon kahuiai waliko tenen masin gol, silva, hat tuah, maia pate solian wexoan tenen tenen, pata tuah tenen poun solian ma waliko tenen laha tanomi ani nisi elefen, samen, pata tenen kahun lalap, brons ma pot tenen pate solian. 13Kemuk lato hahangaini waliko ti hanamui an, tesol waliko poun solian masin sanda, mer ma frankinsens, waen, wel, palawa ti an, komem, bulmakau, *sipsip, hos ma karis. Lato hangaini hehetekie tataen seilon.
14“Aope ie laha kakane teka Babilon, ‘Hatesol waliko solian ti lomuto al ape i tapo tamusuen. Lawe kilai soxiamuto tenen tuah ma kahun lalap ape i tapo kalutawen. Amuto kum pon uke aliakean.’
15“Ape teteka seilon totonalato soli ti hangainiai soxi hani teka Babilon, lato tu siasia nake sale lalape kawatan ti teka Babilon i hamatau lato. Lato tang tahane ukek,
16“‘Malehe ape lialui teka Babilon!
Kemuk i tehu taon axan lalap.
Soliai tanoman masin tel hehin
i pupuxui maia wexowexon tenen kahun lalap
ma pis tenen i kamakam ma hat pate tuah.
17Tuahe ti teik taun pate kukunun laha hamanana hatapo
kilai soxiamuto!’
“Hatesol huniwai waian, teka maho, teka kukuoxi laha ma teka laha waxeni totonalaha puasain ti itax, tin laha tu siasia. 18Ti laha ningahiwa axui ah tule ti Babilon lulua, laha kak tang eliliel ukek, ‘Tap tehu taon soliaian tetehu ie lilian ti imat hanima aope.’ 19Laha towi pekeun hani he patulaha kolai lalape tatahan. Laha tang kakak tutuen ukek,
“‘Malehe ape lialui teka Babilon!
Kemuk i tehu taon axan lalap.
Teka huniwai waian lawe uke halapa moni
ti hangaini hanialato soxi.
Tuahe ti teik taun kukunun
laha hamanana kalutini hatehu taon.’”
20Ape tenen kinax ti tone Haeu kak tatale ukek,
“Amuto teka ti tone Haeu, amuamua.
Teka kuluiai kakaian, teka *aposel
ma teka seilon ti Haeu liai,
amukewa waliko tetenen ien.
Haeu ape i kahui aliake hani teka Babilon
lawe waliko lialun lato aile haniwen amuto.”
21Muhin nga ningahi tel engel pate pohen akeni lauti tehu pot lalap pate kawatan. I hok towi hani itax ape i ukek,
“Xoxoi tehu hokahoka ie pate masin ti
Haeu hamanana hawane Babilon
ape kaha kum ningahi ulea tehu taon ien.
22Tap kaha po hong ulea tangiai kita, kawakau,
suhusuh ma seilon pakupak.
Puasain ti tanomiai waliko ma apeseniai an,
tin tap i po sohot ulea.
23Hatehu Babilon to leili tilokoan
nake tap tenen i hahaxewa leilon.
Tap amuamu tenen masin ti salasala
i po sohot ulea ien.
Haeu hani tesol kawatan ien
nake teka hangainiai soxi leili Babilon
laha uke ax lalap
ti mongohe hamasamas ti teka seilon ti Babilon.
Tin kilan teka Babilon lato ailele saun ti pipis
ape lato neini hakalala teka seilon ti
xux texux texux.
24Teka Babilon kau kawatan tenen ien
nake lato sa ti teleiai *teka kuluiai kakai Haeu
ma teka seilon ti Haeu liai ti xux texux texux.”
Copyright information for
SSG